NIKU lea ráhkadan soahpamuša Finnmárkokommišuvnnain buvttadit «Áššedovdi guorahallama geavahusas ja riekteáddejumis mii guoská eatnamiid, čáziid ja mearrabivdosajiid geavahussii guovlu 7:s – Deanus».
Kártemii gullet bivdosajit Deanuvuonas ja buot eatnamat maid Finnmárkkuopmodat (FeFo) válddii badjelasas Stáhtameahcis dalle go Finnmárkoláhka váldui atnui suoidnemánu 1.b. 2006:s. Dasa gullet maid eatnamat maid FeFo livččii hálddašan maŋŋá dán beaivemeari. Finnmárkokommišuvnna bargoválddahallamis dán doibmii, de eai gula Deanu čázádaga oasit gokko luossa johtá dán kártemii.
Historjjálaš ássanlogahallan ja luonddugeavahusa lassin áigu guorahallan čalmmustahttit čuovvovaččat:
- Geavahus ja riekteáddejupmi mii lea čatnon vutnii; mearraluossabivdui, vuotnabivdui ja eará mearraresurssaid ávkkástallamii
- Geavahus ja riekteáddejupmi boazodoalus
- Geavahus ja riekteáddejupmi mat leat čatnon jávrebivdui ja meahccegeavahus
- Astoáigegeavahus/almmolaš geavahus
Guorahallanbargu čađahuvvo ovttas Sámi ealáhus- ja guorahallanguovddážiin (SEG) ja Sámi info:n. Guorahallan válmmaštuvvo ovdal geassemánu 30.b. 2016, ja vuođđuduvvo čálalaš gálduide ja eará čálalaš materiálaide. Dan lassin čađahit NIKU ja SEG jearahallamiid válljejuvvon ovttaskas olbmuiguin ja servviid, joavkkuid ja ealáhusaid ovddasteddjiiguin Deanus. Sii bovdejuvvojit boahtit čilget otnáš ja ovddeš luondduriggodagaid geavahusa ja guovlluid FeFo eatnamiin, ja dan geavahusa riekteáddejumi. Jearahallamat álggahuvvojit miessemánus 2015, ja buot jearahallamiid vuolggan lea topográfalaš kárta. Jearahallan gielat leat sámegiella, suomagiella dahje dárogiella.
Guorahallanbarggu jođiheaddji, Elin Rose Myrvoll NIKU Davviguovlluidossodagas Romssas, deattuha ahte jearahallamat eai leat riektevuoigatvuođaid registreremat Finnmárkokommišuvdnii, muhto leat oassin áššedovdi guorahallamis man ulbmil lea kártet geavahusa ja riekteáddejumiid. Guorahallan ii galgga maid váldit beali jus čuožžilit riektevuoigatvuođagáibádusat dahje konkluderet vejolaš priváhta ja kollektiivva vuoigatvuođain, riektevuoigatvuođagažaldagain galgá Finnmárkokommišuvdna guorahallat.
Gažaldagat mat gusket guorahallamii dahje jus háliida oassálastit jearahallamii sáhttá čujuhit deike:
Elin Rose Myrvoll, NIKU, Tel. 77 75 04 24/ e-poasta: elin.myrvoll@niku.no
Poastačujuhus: NIKU, Framsenteret, Postboks 6606 Langnes, 9296 TROMSØ