Mii leat sáme konsuleantafitnodat mis leat bálvalusaid dego prošeaktajođiheapmi, guorahallan- ja plánabarggut, fitnodatoaivadeapmi ja proseassajođiheapmi. Deanu giellagáddi gullá maiddái min doibmii. Min áigumuš lea nannet ealáhus- ja servodatovdáneami sáme guovlluin. Mis leat máŋga doaimma mat čađahuvvojit ovttas allaskuvllaiguin, universitehtaiguin, dutkaninstitušuvnnaiguin ja ovttaskasolbmuiguin geain lea spesiála fágakompetánsa ja mii oassálastit aktiivvalaččat máŋga fierpmádagas ovttas eará sáme institušuvnnaiguin. Min doaibmabáiki lea Deanu birasviesus Deanušalddis.

Deanu giellagáddi vuođđuduvvui bissovažžan oassin SEG’ doibmii jahki 2002. Giellaguovddáš galgá leat mielde nannemin ja ovddideamen sámegiela ja kultuvrra árgabeaivvis ja almmolaš oktavuođain. Giellaguovddáža váldo olahanjoavku lea Deanu álbmot, muhto mii fállat maiddái heivehuvvon giellabálvalusaid gieldda olggobeallai. Min áigumuš lea váldit vára sámegielas ja kulturárvvuin, ráhkadit sosiála dorvvolašvuođa gos gieldda ássiid identitehta nannejuvvo lagaš birrasii gullevašvuođa doaimmaid bokte ja ráhkadit kulturovdánanvejolašvuođaid mas lea vuođđun iešvuohta, muhto dattetge eará kultuvrraid gudnejahttin.